no comment !!

بحب أهدي حالي في يوم عيد ميلادي

هاي الأغنية !!

 بعرف مش لعيد الميلاد بس هيك حبيتها

كل عاو وانت بخير سمسم

ليش هدية الأخ ما في أروع منها ؟؟!!؟

حكيت من قبل انه ما الي كتير بالتكنولوجيا وخاصة التلفونات يعني كل تلفون بيجيني بضل معي 3 سنين أقل شيء ... مش عارفة شكلي بستخسر ادفع فلوس في هيك اشياء  وسبحان الله من اول ما بلشت استخدم تلفونات وانا دايما يصحولي هدايا  اول تلفون انا دفعت نصف سعره وأخوي محمد الله يسعده كمل عليه  وتاني تلفون بعتلي اياه أكثم حبيب قلبي  والتلفون اللي كان معي كمان اعطاني اياه أخوي أوس ..... الي بستخدمه 3 سنين وجد انه رائع وما ماله اشي  ..... لكن شغله المسجات من امريكا للبلاد العربية مشكلة المهم كنت بفكر أجيب الاي فون بس شكله  فترة التفكير طوّلت  ..... ما شفت الا اخوي اوس باعتلي تلفونه الآي فون مع بنت عمي اللي راحت زيارة على عمان (طبعا مع معسل ولبن جميد) ههههه !! المفروض انا اللي ابعتلهم تلفونات !! المهم يعني صدقا هدية متل هيك من الأخ كمان والله بتسوى مليون دينار وجد شو مبسوطة عليه !!!بعرف الزوج ممكن يجيب لزوجته هدية بس ما بعرف هو بحالتي انا ولا الكل هيك بس بتحسهم انه يعني هايني جبتلك هدية تذكري وتطلبيش اشي من هون لسنة هههههه

بس هدية الأخ ولا أروع !

الله يسعدهم !

مواقف 10

هذا الاسبوع صار معي 3 مواقف كلها عن نفس الاشي من وين انا وعن العرب وعن المسلمين ..... أول موقف وحدة سألتني عن شغلة وانا بالشغل وطبعا من الشكل و اللكنة مبين اني مش امريكية ! المهم سألتني من وين أنا بحكيلها من الأردن ! بتحكيلي طيب ليش دايما في مشاكل بكل البلاد العربية وللهالدرجة مشكلة العرب واليهود عويصة محدش عارف يحلها !؟وأحلى سؤال بتحكيلي هم الفلسطينية الهم أصول في فلسطين ولا هيك مجموعة ناس عايشين هناك ! مش اليهود أصلا كانو موجودين في فلسطين قبل أي حد !؟ انا بصراحة ما كان المفروض آخد وأعطي معها لانه ما بعرف كيف نفسيات العالم اللي هون بس لما حكت الفلسطينية ما الهم أصول قبعت معي حكيتلها اسمعي حبيبتي !! هههههه لأ ما حكيت هيك بس حكتلها أهل فلسطين موجودين فيها من آلاف السنين وهم اللي الهم حق فيها واليهود صحيح كانوا موجودين في فلسطين لكن من كثر ما كانوا ظالمين ربنا عاقبهم بانهم يخرجوا من أرض فلسطين ويعني هذا بعطيهم الحق ييجوا يقتلوا الناس اللي فيها عشان كانو ساكنين هون في يوم من الايام وحتى ما يخلوا الناس يصلوا بالمساجد ! زي لو فكروا الهنود الحمر ييجوا يقتلوا كل اللي عايشين في امريكا لانهم كانوا عايشين فيها في يوم من الايام !!! حكتلها مشكلة الأمريكان انهم بس بسمعوا من وسائل الاعلام اللي بس بتوصل صورة فرقة معينة بدون ما أوضح مين هالفرقة أو المجموعة بس يبدو انها بتعرف هالشغلة وأيدتني فيها .... وبالنسبة للمصالحة في كتير عوامل بتلعب دور أهمها المصالح وما فسرت كتير ولكن يعني شغلة كان لازم أحكيها بالآخر لحتى ألطف الجوانه ان شاء الله في يوم من الأيام يعم السلام على الجميع 

الموقف الثاني بضحك ... واحد بسألني انت من وين بحكيله من الأردن بحكيلي هاي في الاتحاد السوفيتي ؟ هههههه بعدين زبط حاله وعرف وين ....بعد شوي بحكيلي هاي اللي ملكها حسين ؟!! حكيتله عليك نور !!!! بس كان ملكها من 14 سنة !! ههههههه

الموقف الثالث صار اليوم كمان واحد بسألني من وين انت بحكيله من الأردن صار يحكيلي عن ابنه وصاحبة ابنه اللي الله يحرسها ويخليها لأهلها (هي خليجية مش رح أحكي من وين بالضبط)  مشكلته انه كيف هي مسلمة وابنه مسيحي ! وانه اذا اجاهم أولاد على مين رح يطلعوا وانه  هل رح تخليه يغير دينه ولا لأ ! انا حكيتله احنا عنا الوحدة ما بتتزوج الا مسلم .... بعدين بحكيلي هي ما بتوكل لحم خنزير وبتشرب مرات مش دايما .... سألني انت بتشربي بحكيله لأ بحكي يعني ما بتنبسطوا بالمرة يعني يو كانت هاف فون !! بحكيله اذا الفن بده يضيعلي مخي وجسمي بلا منه !! نرجع للمحروسة اللي عايشة مع ابنه وما في داعي أفسر شو يعني عايشة معه كلنا كبار وبنفهم وما بتشرب كتير بس مرات !! وأهم اشي انها ما بتوكل لحم خنزير هذا يا جماعة أهم اشي !!!!! خطر ببالي احكيله ولا تشغل بالك يمكن هي تصير  مع دين ابنك بس ما حكيت هيك بس حكيتله ممكن يتفقوا على الاختلافات اللي بينهم الحب ما  بفرقه اي اشي ! يعني من هالحكي الفاضي !! هههه آآآآ لما حكيتله انا من الأردن بحكيلي انتو اللي ملكتكم حلوة صح ؟!! صح ونص يا عمي هههههه

طلعت صيد مرة ثانية وصدت والله منيح يعني طلعت المرة الأولى مش حظ مبتدئين ! هذا انا صيادة ماهرة وانا ما بعرف !! بلا صيادة ماهرة بلا حكي فاضي والله بحسها شغلة حظ !! صح ولا لأ ؟!

الله يحبّب فيكي كل أمة محمد

من اسبوع تقريبا كنت معزومة على عيد ميلاد ناس بعرفوهم دار حماي .....كانت جمعتهم حلوة وولاد صغار وعجقة ! تذكرت جمعاتنا وكيف لما اخواني يتجمعوا عند امي وأبوي ! ما علينا .... قاعدين ومعمرين الأرجيلة ولا أهلي بتصلوا فيه ! عادي الله يسعدهم دايما بتصلوا ...انا سحبت حالي وطلعت أحكي معهم ! الحمد لله كويسين ! وصيتهم يبعتولي لبن جميد ومعسل وقهوة مع ناس جايين من عمان ! يعني كالعادة ما بنتغير ! اجا الدور أحكي مع امي ! دايما بحكي معها يعني ما في مشكلة بس ما بعرف ليش بس حكتلي الله يحبب فيكي كل أمة محمد - دايما بتحكيلنا اياها كلنا- هيك خنّقت وكان نفسي أبكي !!بحكيلها يما هسه ادعي كل الناس يحبوني انا مش عند أمة محمد بس هههههه وبحكي وانا ماسكة حالي جد مش عارفة ليش !! كله من مزاج اف ام ! طول الليل و النهار حاطين أغاني للأم !! ضلّت تدعيلي زي دايما وانا بس بدي أنهي المكالمة عشان ما أفقد أعصابي وانا بحكي معها ! لانه والله ما اشي بقنعها انه ما في اشي واني بس نفسي احط راسي على ركبتها !! ودعتها ودمعت شوي بس الناس والعيلة كلها موجودة ! ضليت أكابر على حالي لحتى طلعت بالسيارة مع بنت حماي وبعدها انفجرت بكى ! الله يسعدك يا امي وأشوفك على خير قريبا 

عيــــــــناك

مع انها قديمة لكن أكثر من رائعة ..... مش قادرة أشعر بالملل منها

So If U realize that U R Irrational and U have bad judgments ??!

What a person can do to fix his mind ??!!?

شو اللي بصير بسوريا؟؟؟!!؟

والله ما انا عارفة شو يكون موقفي يعني ما في انسان عاقل برضى اللي بصير بسوريا لكن بتقرأ كمان في مواقع انه مؤامرة عالمية على سوريا وانه شهود عيان كذابين ومغالاة بالوضع هناك  ..... مش عارفة شو اللي بصير وشو الواحد يفكر أو يعمل 

 يا الله ارحمنا برحمتك وارفعغضبك   وسخطك عنا وابعد عنا الفتنة

أسئلة عمرها ما خطرت على البال

بصراحة بعتبر اللي متربيين وعايشين في البلاد العربية محظوظين من الناحية الروحانية والدينية ! لانه بكون الدين دخل في كل شيء صغير وكبير في حياتنا أو هدا اللي صار معي .... وبنعتبر كتير أشياء من المسلمات !! يعني بدون ما نسأل حالنا ليش هيك ! مرات حلو نفكر ونسأل حالنا ليش وكيف لكن أنا بعتبر انه مرحلة التسليم الكامل لأمر ربنا نعمة ! صحيح أخذ شيء عن قناعة أفضل لكن التسليم أريح للبال !! ليش بحكي هيك ! لانه اللي عايشين بالبلاد الغربية بتحسهم بدققوا وبدهم تفسير لكل صغيرة وكبيرة حتى مرات مع انه بكون أسألتهم منطقية لكن لو احنا حتى فكرنا فيها بنوقف للحظة بعدين بنحسها كفر وبنصير نستغفر ربنا ! 

في كتير جلسات مع عائلات نتطرق لمواضيع في الدين وعن جد يسألوا أسئلة ما عمرها خطرت على البال أو أمور ما سألنا نفسنا ليش وكيف ! وبما اني جاي طازة من البلاد العربية كتير مرات بوجهوا الأسئلة الي ! انا بعتبر نفسي أو بتمنى أكون متدينة بس جد مرات ما بعرف شو أجاوب !!! بعض هاي الأسئلة أو النقاشات

انه هل الرسل قبل سيدنا محمد كانوا يصلوا ويصوموا مثلنا ؟!! انا كان جوابي لأ لانه الصلاة نزلت على سيدنا محمد عليه السلام ! طيب كيف كانت طبيعة عبادتهم ؟؟

شرب الخمرة !! انه لو بس الواحد لو شرب شوي صغيرة وما سكر !! جوابي طبعا انه لأ حرام ! ما أسكر قليله فكثيره حرام !! طيب ليش ؟؟ السيء في الخمرة انه الانسان يفقد عقله وانه ما بنشرب لدرجة السكرة  !! انا طبعا جوابي حتى ولو حرام يعني حرام

الحجاب ! بحاولوا بأي طريقة يقنعوك انه الحجاب مش واجب لانه ما في آية تنص على الحجاب وانه كلام الرسول عليه السلام مش قوي مثل اللي ورد في القرآن .... استغفر الله العظيم ولما أذكر الآية 31 من سورة النور

وَقُلْ لِلْمُؤْمِنَاتِ يَغْضُضْنَ "

مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ 

زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ 

عَلَى جُيُوبِهِنَّ وَلَا يُبْدِينَ زِينَتَهُنَّ إِلَّا لِبُعُولَتِهِنَّ 

أَوْ آبَائِهِنَّ أَوْ آبَاءِ بُعُولَتِهِنَّ أَوْ أَبْنَائِهِنَّ أَوْ 

أَبْنَاءِ بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ 

أَوْ بَنِي أَخَوَاتِهِنَّ أَوْ نِسَائِهِنَّ أَوْ مَا مَلَكَتْ 

أَيْمَانُهُنَّ أَوِ التَّابِعِينَ غَيْرِ أُولِي الْإِرْبَةِ مِنَ 

الرِّجَالِ أَوِ الطِّفْلِ الَّذِينَ لَمْ يَظْهَرُوا عَلَى عَوْرَاتِ 

النِّسَاءِ وَلَا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ 

مِنْ زِينَتِهِنَّ وَتُوبُوا إِلَى اللَّهِ جَمِيعًا أَيُّهَا 

الْمُؤْمِنُونَ لَعَلَّكُمْ تُفْلِحُونَ"

بكون الرد انه الآية فقط لنساء النبي عليه الصلاة والسلام وحتى لو للمسلمات انه فقط عدم التعري وانه الحجاب كغطاءللرأس غير ضروري والحكمة من الحجاب انه المرأة ما تلفت الانتباه لكن بالغرب بالعكس الحجاب ملفت للانتباه أكثر من لو انت مش محجبة

موضوع المرأة لما تتطلق أو يموت زوجها انه ليش لازم ما تطلع من البيت أو تتزوج الا بعد فترة معينة ... انا بصراحة كمان ما بعرف السبب ... حاولت أبحث على النت لكن ما حسيت بشيء مقنع وانه بصراحة بأمور الدين ما بثق بالنت كتير

يمكن انا كمان لازم اطور اسلوبي بالاقناع وأقرأ أكتر في الدين لانه مثل ما حكيت احنا تربينا على الاقتناع والتسليم لأمر الله عز وجل لكن حلو نعرف نقنع الناس بأرائنا ! انا ما بحاول اكون عصبية أو احكي بلا هالحكي الفاضي ولا اسكت احسنلك ! ههههه لانه حلو كمان تقنع الناس بوجهة نظرك

صحيح مع انه السنة قربت تخلص بس كل سنة والجميع بخير وانشاء الله تكون سنة طيبة للجميع

تعرية الصدور

شبابنا العرب يعرون صدورهم امام الرصاص دفاعا عن الحقوق وبحثا عن الحرية وشابات تعرين بالرغم عن انوفهن بايادي الانظمة الفاسدة وهن يطالبن بتحرير المجتمع القمعي الذي لا يفرق بين رجل وامرأة .... كل الاحترام والتقدير لهذا التعري !! أما الموجة الجديدة بين فتيات لا ادري هل نطلق عليهن اسم عربيات أم لا ولكنهن اخترن هذا التوقيت ليتعرين على صفحات مجلات عالمية ولا زلت لا أفهم السبب !! بعد ان أثبتنا للعالم بأننا متعلمون ونطالب بحقوقنا بالطرق السلمية نرى مثل هذه الأمثلة المخزية والتي حسبت علينا بداعي حرية ابداء الرأي  والمساواة .... لا حول ولا قوة الا بالله العلي العظيم

2011 ... عام الموت والفتن أم عام الأمل والحياة

عشت من العمر ما عشت ولكن لم أعهد عاما كهذا العام ! لا أدري هل نشعر بالفرح والفخر أم بالغصة والألم ! رفعنا راسنا أخيرا لنطالب بحريتنا التي لطالما كانت أمنية وحلم بعيد المنال .... أمل بأن نتنشق الهواء بدون ضيق وننظر الى السماء وكأن لا حدود لها .... أخيرا هناك بصيص أمل .... جاء ممن اعتقدنا انهم انقرضوا وانصهروا مع الانحلال الأخلاقي والاحباط المستمر الذي ذقناه مذ يوم خلقنا .... جيل كان يكبر واعيا لما يدور حوله بالرغم من محاولات غسل الدماغ وكسر العزائم التي كانت مستمرة من الداخل والخارج !! شباب يفخر بهم التاريخ ويسجلون المستقبل بدمائهم .... أعادوا لنا الأمل بالحياة والشعور بالفخر والاعتزاز  ..... ما لم نتوقعه هو قوة القبضة البائسة والعفنة والتي ستحاول اعادتنا الى الجحيم من جديد لم نتوقع بأن تكون بهذه القسوة والجبروت !

بالرغم من القتل والتعذيب الا ان خيار العودة الى الوراء لم يعد مقبولا ....لا نريد الا الحرية ولن نسكت عنها ... دعونا ننعم بها .... دعونا وشأننا 


 اذن هو عام الأمل برغم العذاب والدماء.... لا أظن ان أحدا ينكر ذلك .... حماك الله يا بلاد العرب ورحم موتاك وجعلهم شهداء مع الصدّيقين ... وأخذ بيد شبابك الطاهر واللهم خذ أعداء الأمة والحرية أخذ عزيز مقتدر يا أرحم الراحمين


لنرجو بأن يكون العام المقبل عام قطف ثمار الحرية 

ليش يا جيش ؟؟

وقف مع الشباب وقت الثورة عشان يذبحهم ويهينهم بعد الثورة ؟؟!!! والله اللي بنشوفه بصير بمصر أوسخ وألعن منأيام مبارك !! هيك تكون الذكرى الأولى للثورة ؟؟

 اخص يا جيش .... وحسبنا الله ونعم الوكيل

Loving This Song !!!! (Love Like Crazy)

مواقف 9

السنة أول مرة بجرب أعمل الديك الرومي في Thanksgiving مش من مبدأالاحتفال بس وين ما بتروح بتشوفه محمر وشكله بشهي فقررت أعمله وما أخبر حد لانه ما كانت العيلة مقررة تعمل اشي ! وهيك اذا ما كان مستوي أو طعمه عجبة الله بستر على الجميع ههههه فجأة اجا زوجي بحكيلي هاي فلانه عاملة كذا وهديك عاملة هيك فقررنا انه نتجمع كلنا ونتشارك بالأكل !! يا حبيبي واذا طلع مش زاكي  !!؟  لكن الحمد لله ... كان بشهي بس بده وقت أقل بالفرن ....الكل شهدلي انه أزكى من اللي بعملوا الأمريكان لانه بكون في شويه زنخة وما  بضيفوا عليه لا بهارات ولا اشي ! وانا جربته ! عن جد بقلب المعدة 

طول عمري بحب الأرجيلة بس لاني بعرف مضارها ما بأرجل كل يوم ولا كل أسبوع ومرات كل أكمن شهر !!!! لكن هون مع أهل زوجي !!! كل عيلة عندها أرجيلة وبس تزورهم لازم يشغلوها وخاصة حماتي !!! يا عمتي والله ما بدي اليوم !!! بس شوي ! بدك تخليني أأرجل لحالي !!! وبس أضل بالبيت بيجي زوجي بطلب أعمرله اياها !!!! لا كسبنا صحة

مرة واحد أمريكي بسألني انت من وين بحكيله انا من الأردن .... سكت .... بحكيله بتعرف وين الأردن ؟ بحكيلي آ في شرق أوروبا !!! ههههه بحكيله انتو الأمريكان بتعرفوش خارج نطاق الولايات عندكم ومنيح اذا بتعرفوهم !! طبعا حكيتله وين الأردن وعلمته يحكي أهلا وشكرا ههههه ما عرف يحكي مرحبا

تقريبا من شهرين رحت أول رحلة صيد سمك في حياتي .... وجد كنت مش متشجعة أروح لانه بعرف الصيد ممل وممكن ما تصيد ولا اشي بس جد كانت رحلة روعة وصيدت 9 سمكات 4 كبار و 5 صغار ... بتحس بالفرحة لمن تصيد ما بعرف ليش

هاي اول سمكة بصيدها

زوجي صاد سمكة قرش صغيرة بس لانه ما بناكلها أعطيناها لصينيين كأنه أعطيتهم 100 ليرة وبتصوروا معها وأحلى اشي صاروا يحكوا للناس انه همه اللي صادوها ههههه انا حملتها وتصورت معها بس كنت نشفانة خوف 

My Own World Turns 6 Years !!

I almost forgot that it's Today ! 7/12 !! 6 years ago !! was my first post in my Blog ! which I created to be my own sanctuary ! to say things berried in my mind ..... just for venting when I don't want any body to bother ! sometimes It felt safe because no one is judging me and that's why anything in my mind could be transferred into words !! without thinking ! for me that was the Joy of blogging !! I can't say I feel it recently ! 


but still I can't give up on my hidden space ! not yet !


Happy Blogoversery my sweet little home !  

عيد من الآخر

صارلي تقريبا شهر واصلة من عمان ! ومن هناك عرفت انه ما رح نرجع على تكساس ! رح ننقل ولاية تانية حسب شغل زوجي ! لكن اللي ما كنت أعرفه وعرفته قبل ما آجي انه رح نعيش في فلوريدا قريب من بيت حماي ومعظم أهل زوجي ! يعني بصراحة انا فرحت وانغصيت بنفس الوقت ! انه لو سافر وراح واجا بكون في ناس حولي وصعب انه يتركني زي آخر مرة وكمان التنقل مش كتير حلو وانه في ونس حولي بس انا جد طبيعتي بحب اشتاق ههههه يعني ابعد تحلى وبصريح العبارة ما بحب الاحتكاك الكتير مع العالم مين ما كان يكون ! وما شاء الله كلهم قراب على بعض يعني تحس حالك في حارة من حواري عمان والحمد لله 

المهم انا نقلت على بيتي بس الأحد من الاسبوع الماضي وبين بلشة التنقيل والزيارات جد مش مجمعة بالمرة  ..... يوم الثلاثاء بالليل ما بعرف شو اجا على بالي اشوف الفيس بوك قبل ما أروح أنام ولا بنت أختي كاتبة انا لله وانا اليه راجعون ... طبعا انا شوية العقل اللي كانو عندي تبخروا ! رادة عليها صاحبة الها مين من غير شر؟؟بتحكيلها خالة ماما ! طبعا خالة مامتها يعني خالتي وانا هاتي يا عياط !! وأتصل على أختي على طول ! شو اللي صاير مالها خالتي ؟؟ بتحكيلي ما مالها اشي تعبانة شوي وامي عندها ! بحكيلها لأ ماتت !!! وأختي بتحكيلي لأ ما ماتت !!؟؟ بس هاي لانا بتحكي انها ميتة !! طلعت هي المسكينة لسة مش واصلها الخبر كانت الساعة 6 الصبح عندهم ! وليليتها ما سكتت عياط مع انه خالتي من أول ما وعيت على الدنيا وهي في السرير وآخر فترة تعبت بس خلص ما بهون على الانسان شو ما كان ! الله يرحمها ويدخلها فسيح جناته

خبر مثل هيك بنكتب على الفيسبوك ؟

 طبعا يوم الأربعاء اجو بنات حماي وحماتي يعزوني وحماي ما قدر ييجي لانه كان تعبان وانبسطت انهم اجو وحتى حماي حكى معي وعزاني واعتذر لانه ما اجى وانا نوعيتي ما بلوم أي انسان على أي شيء .... المهم تاني يوم واللي هو الخميس ... كل هدا الاسبوع الماضي ! آ يوم الخميس اجت عندي بنت حماي بدها تشرب فنجان قهوة الصبح وبتحكيلي اذا بتحبي تطلعي ! انا عندي كتير ترتيب وشغل بس الحمد لله اللي طلعت معها يومها ! لفلفنا شوي وجبت أكمن شغلة ناقصة ومرينا على الصيدلية ولا زوجي ومعه والده بالصدفة شفناهم هناك !سلمنا عليه وطلب مني أجيبله بزر عين شمس وعزاني كمان مرة بخالتي وكان ما شاء الله عليه بضحك ما ماله اشي !! شوي صغيرة بدها تروح تجيب أولادها من المدرسة اجانا تلفون انه حماي أغمي عليه وأخدوه على المستشفى ! ما خفنا كتير لانه اله فترة تعبان وكتير بغمى عليه وهوقلبه كتير ضعيف ! نسيت موضوع ولادها وضلينا رايحين على المستشفى وهي تعيط وانا أحاول أهدي فيها بس جد طلعت فاشلة في هيك مواقف 

جبنا حماتي وضلينا رايحين عالمستشفى وطلبنا نشوفه وبس وصلنا بنسأل الممرضة عنه سكتت وحكت لحظة بس ييجي الدكتور ! احنا حسينا في اشي غلط ! بعدها شفنا زوجي وحكالنا انه حماي توفى !بلّمت وبلشوا يعيطوا !بكيت الا لما شفته ! انه بس من ساعة شفته بحكي وبضحك وهلأ هيك جثة ما بتتحرك ! ما قدرت أقاوم ! لما صحوا على حالهم وصاروا يحكو بالدفن أكيداحنا مش بالأردن اليوم مات بكرة على صلاة الظهر يوم الجمعة الدفن لأ ! في مراسيم الدفن وأولويات وما بعرف شو !!! جد لحظتها دعيت أنه بس أموت أكون بالأردن أو بفلسطين أو أكيد السعودية!! يمكن كان التأخير لصالح بناته لانهم اجوا من ولايات تانية 

الدفن كان يوم السبت لكن كلهم كانوا موجودين يوم الجمعة ....اقترحت على سلفتي نعمل أكل للجميع في بيتي ... كان شكلنا بضحك واحنا معجوقين وبسرعة بدنا نخلص وما شاء الله على رأي جارنا أكل لجيش بس الحمد لله طلع زاكي 

يوم الدفن اللي هو كان وقفة عرفة وهدا شيء أول مرة بحياتي بعمله انه رحنا كلنا على المسجد نصلي صلاة الميت وأول مرة بحياتي بصليها وبعدين رحنا كمان على المقبرة وشفنا الدفن ! بالأردن من المستحيلات النساء يعملوا هيك وأنا بتمنى اني ما أعملها مرة تانية !! بيت العزا للرجال كان في بيتي وللنساء كان عند أخو زوجي ! أيام ما بتمنى تنعاد أبدا ! كل ما يهدوا شوي يرجعوا يتذكروا ويصيروا يعيطو !! الموت صعب عن جد !!! بس كل اللي كنت أدعيه وأتمناه انه الله يرحمه ويعطينا حسن الخاتمة 

 انا لله وانا اله راجعون

صدقا بس مبارح واليوم رقت في بيتي وهديت أعصابي 

وكل عام وأنتم خير

Al Qaddafi Is DEAD ??!!!!!!

I still can't believe my eyes !! is he REally truly positively Dead ?? or he will start dead walking and giving statements again ??

We can't say Allah Laa yer7amoo ! but we can pray thanking Allah's that he is Dead ! and we wish the best for our Brothers and sisters In Libya !
Al7amdolellah !

Back to the State !

I came back few days ago .... I have so many things to tell about my visit to Jordan :p just give me few days till I give away all the coffee and baqlaweh that I had to carry with me !! :S

miss u all !! 

R U Still Alive ??

Why would anybody say this statement?? especially if u haven't seen him/her in a very long time ??!! It's soooo rude ?! I think when ever anybody say this to u it means he really hates u and wish u were dead !! and u some how disappointed him by being alive !! no other explanation !! 

اقتحام السفارة الاسرائيلية في مصر

لا أدري ما هي النتائج لمثل هذا التصرف ومن وراء هذاالاقتحام وما هي دوافعه ... وقد لا يكون لدي بعد نظر سياسيا ولكن لا أخفي شعوري بالسعادة عند سماع الخبر ... آن الأوان لوقف الاستهانة بمشاعر ودماء العرب